Төр засгийн үйлчилгээг эрхлэх газар үйлчлэгчийн сургалт явуулна хэмээн "Эрдэнэт" үйлдвэртэй гэрээ хийсэн ч тусгай зөвшөөрлийн хугацаа нь аль 2022 онд дууссан гэсэн мэдээлэл манай сайтад ирсэн.
Энэ талаар тус газрын Захиргааны хэлтсийн дарга Д.Уртнасантай холбогдоход “Энхтөр хариу өгнө” гэсэн. Тиймээс чанарын менежмэнтийн ахлах мэргэжилтэн н.Энхтөрөөс тодруулахад, сургалт явуулах зөвшөөрлийн хугацаа 2022 оны 12 дугаар сарын 28-нд дуусч 2023 оны 01 дүгээр сарын 05-нд Хөдөлмөр нийгмийн хамгааллын сургалт, үнэлгээ, судалгааны институтэд зөвшөөрөл сунгуулах хүсэлтээ хүргүүлсэн гэсэн юм. Улмаар Хөдөлмөр нийгмийн хамгааллын яам, Боловсролын яам хамтарсан журам 2024 оны эхээр гарсан бөгөөд тусгай зөвшөөрөл олгохгүй, харин чадамжид суурилсан сургалтын хөтөлбөр батлуулахаар болжээ.
Дээрх тайлбараар бол Төр засгийн үйлчилгээг эрхлэх газар 2022 оноос хойш зөвшөөрлөө сунгуулаагүй, мөн сургалтын хөтөлбөрөө ч батлуулаагүй байгаа аж.
Тэгсэн хэрнээ яагаад сургалт явуулж дүрэм журам зөрчиж байгаа талаар албан ёсны тайлбар авахаар тус газрын дарга Ж.Тамиртай холбогдсон боловч “Энхтөр мэдээлэл өгнө” гэв.
Удирдлагууд нь мэргэжилтэн рүүгээ бухчихаад албан ёсны тайлбар өгөхгүй байгаа нь хэр зүй ёсны үйлдэл вэ?
Сургалт явуулж үнэмлэх олгоно гэдэг хэн хүссэний дурын ажил биш. Дүрэм журам хэрэгжих учиртай. Тиймээс ч хариуцлага шаардаж байгаа юм.
