Эрчим хүчний сайд Б.Найдалаагийн өрөөнд түүний туслах гэх эмэгтэйн хийсэн бичлэг цахим орчинд шүүмжлэл дагуулж байна.
Төрийн албан хаагчид тавих наад захын хувцаслалтын шаардлагад нийцэхгүй, хэт задгай уг бичлэг төрийн өндөр албан тушаалтны ёс зүй, төрийн байгууллагын нэр хүндийн асуудлыг хөндөхөд хүргэсэн.
Өвөлжилтийн бэлтгэл, эрчим хүчний салбарын алдагдал, ирэх өвлийг гэрэл цахилгаантай, дулаан хангамж тасалдахгүй давах эсэх асуудал яригдаж буй энэ үед төрийн сайдын туслахын зохисгүй үйлдэл олны дургүйцлийг төрүүлэх нь зүй ёсных.
Тэгээд ч Төрийн ордон бол Б.Найдалаагийн орон сууц, хувийн компани биш. Энд жирийн иргэн төрийн үйлчилгээ авах гэж ороход хүртэл тодорхой дэг журам, шаардлага үйлчилдэг. Тиймээс төрийн өндөр албан тушаалтантай хамгийн ойр ажилладаг хүмүүс ч төрийн байгууллагын нэр хүнд, ёс зүйн хэм хэмжээ, дүрэм журмыг хүндэтгэх учиртай.
