Монгол улсаас БНСУ-ын Пусан хотод суух Консул Ц.Жадамбаа Пусан Боомтын Удирдах газрын захирал Сун Сан Гын Дэд Дарга, Олон улс хариуцсан хэлтэсийн дарга Гү Жа Рим болон Олон улсын ложистикийн тасгийн дарга Сол Ин Хэ нартай албан ёсны уулзалт хийв.
Уулзалтын эхэнд Пусан боомтын стратегийн ач холбогдлыг онцолж, хоёр орны харилцаа сүүлийн жилүүдэд улам өргөжин тэлж стратегийн түншлэлт орон болсон төдийгүй энэ онд хоёр орны хооронд Дипломат харилцаа тогтоосны 35 жилийн ой тохиож буйг онцлов. Тэрээр сүүлийн жилүүдэд хоёр орны худалдааны эргэлт жилээс жилд өсөн нэмэгдэж байгааг дурдаад өнөөдрийг хүртэл албан ёсоор Инчон Олон улсын боомтоор Монгол улс руу чиглэсэн ачаа, тээвэр явж ирсэн.
Цаашид өсөн нэмэгдэж буй худалдааны эргэлтийг үндэслэн хоёр дахь гарц болох Пусаны боомтыг нээх нь нэн хэрэгцээтэй байгаа талаар дурдав. Пусан Боомтын Удирдах газрын захирал Сун Сан Гын дээрх саналыг нааштайгаар хүлээн авч гаргасан саналыг дэмжиж бүхий л талаар хамтран ажиллахаа илэрхийллээ. Тэрээр цаашид Пусаны боомтыг албан ёсоор эхлүүлэхэд Пусаны боомтын захиргаатай Монгол Улсын холбогдох байгууллага хамтын ажиллагааны санамж бичиг байгуулах замаар эхлүүлэх талаар дурдлаа. Пусаны боомт албан ёсоор нээгдсэнээр Монгол улсын хувьд БНСУ болон Монгол улсаас ачаа тээвэрлэхээс гадна Монгол улс руу чиглэсэн Америк, Европ гээд бүхий л далайд гарцтай орны ачаа тээвэр хамгийн хямд, хурдан шуурхай тээвэрлэгдэх нөхцөл бүрдэхийг онцоллоо.
Уулзалтын төгсгөлд энэхүү уулзалт нь хоёр улсын худалдаа, эдийн засгийн харилцааг шинэ шатанд гаргах, Пусан боомтоор дамжуулан Монгол Улсыг олон улсын тээвэрлэлтийн сүлжээнд холбох чухал эхлэл боллоо хэмээн онцолж, богино хугацаанд талууд хариуцсан ажлаа гүйцэтгэж, эхний ачаа хоёр талд тээвэрлэгдэх билиг дэмбэрэлтэй өдөр дахин баяр хөөртэй уулзахын ерөөл тавин уулзалт өндөрлөлөө.
Пусаны боомт нь 1876 оноос үйл ажиллагаагаа эхлүүлсэн Пусан боомт нь Дэлхийд дамжин тээвэрлэлтээр эхний 2-т, чингэлэг эргэлтээрээ 6-д жагсдаг, 150 гаруй улсын 500 боомттой холбогддог, жилд 400 сая тоннын ачаа эргэлттэй, Зүүн хойд Азийн тээвэр ложистикийн стратегийн төв боомт юм. Тус боомтыг удирддаг Пусан Боомтын Удирдах газар нь 2004 онд байгуулагдсан ба Пусан, Гамчон, Дадэпү, Шинэ Пусан зэрэг боомтуудыг хариуцдаг байна.
