Эдийн засгийн хямралтай үед төрийн өмчит компаниудыг тавилга хэрэгсэл, унаа машин шинээр худалдан авахгүй байх, урамшуулалт цалин олгохгүй байхыг үүрэг болгосон ч “Эрдэнэт” үйлдвэрийн шинэхэн захиралд Засгийн газрын шийдвэр хамаагүй бололтой, “Лексус-570” авч унасан тухай дуулиан дэгдэж байна.

Ийм баримтыг “Иргэнээ сонсох 11-11” төвийг санаачлагчид гаргаж тавиад буй. Энэ бол ноцтой баримт юм. “Эрдэнэт” үйлдвэрийг “чоно” манаж байна гэсэн үг.

Тэдний дэлгэсэн баримтаар “Эрдэнэт” үйлдвэрийн ерөнхий захирал Х.Бадамсүрэн 2016 оны арванхоёрдугаар сарын 9-нд анхны тушаалаа гаргаж, 300 сая төгрөгөөр “Таван богд” группээс “Лексус-570” маркийн авто машин худалдан авч унажээ. Шинэ машин худалдан авах хөрөнгийг “Эрдэнэт” үйлдвэрээс гаргасан.

Шинэ даргын тансаглал төмөр хүлгээр зогссонгүй өөрийн амьдарч буй байрандаа 24.6 сая төгрөгөөр супер засвар хийлгэсэн.

Мөн “Эрдэнэт” үйлдвэрийн 21 захиралтай нэмэлт цалин урамшуулал олгох гэрээг ч байгуулжээ. Ингэснээр тэдэнд 20 тэрбум 83 сая төгрөг олгосон байна.

Уг нь эрх баригч хүчин “Эрдэнэт” үйлдвэрийн шинэ захирлыг томилохдоо тодорхой үүрэг даалгавар өгсөн. Үүн дотор түмний хөрөнгөнд хямгатай хандахыг сануулсан л байлтай.

Засгийн газрын шийдвэр төрийн өмчит компаниудад хоёр өөрөөр хэрэгжих ёсгүй.

Нэг хэсэг нь бүсээ чангалж зүтгэдэг, нөгөө хэсэг нь олсноо хайр гамгүй цацдаг үрэлгэн тогтолцоо хэвээр үйлчилсээр байвал төрийн өмчит компаниуд алдагдлаа бууруулж чадах уу. Ашигтай ажиллахын тухайд яриад ч нэмэргүй л болов уу.

Хоёр жилийн өмнө УИХ-аас Үндсэн хуулийн цэцийн дарга асан Б.Амарсанааг Засгийн газрын нөөц хөрөнгөөс мөнгө гаргуулж, “Лексус-570” авч унасан хэмээн үзэж, огцруулсан.

Харин “Эрдэнэт” үйлдвэрийн ерөнхий захиралд эрх баригчид хариуцлага тооцох уу, эсвэл дураар нь дургиулсаар байх уу?

ХАРИУ ҮЛДЭЭХ

Please enter your comment!
Please enter your name here