Нийслэлд таван иргэн хордож амиа алдсан харамсалтай хэрэг гараад удаагүй байна. Тухайн иргэдийн хордсон гэх газраас “Найрсаг”, “Gold Chinggis” нэрийн архины шил, “Гайхмаараа” шил арчигчийн сав олдсон билээ.

Өнөөдөр улсын хэмжээнд мэргэжлийн хяналт, цагдаагийн байгууллагын 600 гаруй албан хаагчид согтууруулах ундаа болон хүнсний аюулгүй байдалд хяналт тавин ажиллаж байна. Тухайлбал, Орхон аймгийн Мэргэжлийн хяналтын газар, Цагдаагийн газар хамтран аймгийн хэмжээнд архи согтууруулах ундаа худалдан борлуулж түүгээр үйлчилж буй цэгүүдэд  шалгалт хийжээ. Шалгалтад 354 цэгийг хамруулж “Gold Chinggis” нэрийн 5900 гаруй шил архийг битүүмжилсэн байна. Харин “Найрсаг” нэртэй архи шалгалтын үеэр илрээгүй байна.

Улсын хэмжээнд үүссэн нөхцөл байдалтай холбогдуулан Орхон аймгийн Засаг даргын орлогч А.Түвшинжаргал цаашид ямар арга хэмжээ авах талаар өнөөдөр мэргэжлийн байгууллагуудын төлөөлөлтэй санал солилцлоо. Учир нь нийслэлийн ИТХ-аас архи, согтууруулах ундаа худалдан борлуулах түүгээр үйлчлэхийг хориглосон шийдвэр гаргасан. Энэ шийдвэрийг Эрдэнэт хотод хэрэгжүүлэх шаардлагатай эсэхэд дүгнэлт хийх хэрэгтэй байгааг Засаг даргын орлогч А.Түвшинжаргал онцлон хэллээ. Хуралдаанд оролцсон мэргэжилтнүүд шаардлагатай арга хэмжээг авсан тул аймгийн хэмжээнд согтууруулах ундаа худалдах, үйлчлэхийг хориглох шаардлагагүй гэж үзэж буйгаа илэрхийлсэн. Тиймээс яаралтай ажлын хэсэг байгуулж дахин шалгалт явуулах шийдвэрт хүрлээ.

Засаг даргын орлогч А.Түвшинжаргал хурлын төгсгөлд хэлэхдээ “Шагийн архи заруулахгүй байхад анхаарах хэрэгтэй. Ямар нэгэн баталгаагүй архи энэ замаар борлуулагдаж байж болзошгүй. Мөн Цагдаагийн газрын Замын цагдаагийн тасаг хот руу орж, гарч буй авто машинуудад тавих хяналтаа чангатгах хэрэгтэй байна” гэсэн юм. Мөн ажлын хэсгийг байгуулж хяналт шалгалт явуулах ажиллагааг яаралтай эхлүүлэхийг үүрэгдлээ.

Эх сурвалж: Орхон аймгийн ЗДТГ

ХАРИУ ҮЛДЭЭХ

Please enter your comment!
Please enter your name here