УИХ-ын гишүүн, Хөдөлмөр, нийгмийн хамгааллын сайд, Хөгжлийн бэрхшээлтэй хүний эрхийг хангах зөвлөлийн дэд дарга Х.Булгантуяа Дархан-Уул аймагт ажиллав.
2024 оны Хөгжлийн бэрхшээлтэй хүний эрхийг хангах зөвлөлийн төлөвлөгөөнд орон нутагт Дорнод, Ховд, Хэнтий, Дундговь, Хөвсгөл, Архангай, Дархан-Уул зэрэг аймгийн салбар зөвлөлийн үйл ажиллагаатай танилцаж, мэргэжил, арга зүйн дэмжлэг үзүүлэх арга хэмжээ батлагдсан юм.
Зөвлөлийн дэд дарга, гишүүд Дархан-Уул аймгийн Хөгжлийн бэрхшээлтэй хүний эрхийг хангах салбар зөвлөлийн хуралд оролцож, үйл ажиллагаатай нь танилцлаа. Салбар зөвлөлийн хуралдаанаар 2023 оны тайланг хэлэлцэж, 2024 оны төлөвлөгөөний төслийг танилцуулав. Дархан-Уул аймгийн Засаг дарга Б.Азжаргал аймгийн Хөгжлийн бэрхшээлтэй хүний эрхийг хангах салбар зөвлөлийг тэргүүлдэг бөгөөд 2024 оны 2 дугаар сарын 28-ны өдөр 26 хүний бүрэлдэхүүнтэйгээр аймгийн зөвлөлөө шинэчлэн баталсан байна.
Салбар зөвлөлийн хуралдааны үеэр аймгийн хөгжлийн бэрхшээлтэй хүний эрхийн чиглэлээр үйл ажиллагаа явуулдаг төрийн бус байгууллагын төлөөллүүдээс гамшгийн үед хөгжлийн бэрхшээлтэй иргэдийг хамгаалах төлөвлөгөө гаргах, төрийн бус байгууллага болон хөгжлийн бэрхшээлтэй хүмүүстэй хамтран ажиллах, НҮБ-ын хөгжлийн бэрхшээлтэй хүмүүсийн эрхийн тухай конвенцийн хэрэгжилтийн зүйл заалтыг төлөвлөгөөндөө тусгах, орчны хүртээмжийг сайжруулж замын дуут дохиог нэмэгдүүлэх, сонсголын бэрхшээлтэй гэр бүлийн хүүхдүүдэд чиглэсэн үйлчилгээг бий болгох, аймагтаа мэргэжлийн дохионы хэлмэрч, орчуулагчтай болох зэрэг ажил хэрэгч санал хүсэлтийг илэрхийлж байлаа.
