2014 онд БНХАУ-ын Ерөнхийлөгч Ши Жиньпин автомашин үйлдвэрлэлээр дэлхийд тэргүүлэх зорилт тавьж, үүнд хүрэх гол нууц нь цахилгаан автомашины хөгжилд оршиж байгааг илэрхийлж байв. Ийнхүү 10 жилийн дараа буюу 2024 онд БНХАУ дэлхийн автомашины зах зээлд тэргүүлж, цахилгаан автомашины нийлүүлэлтээр нэгдүгээрт бичигдэж байна. Тус улс өнгөрсөн онд нийт 9.5 сая автомашин нийлүүлж байжээ. Түүнчлэн цэнэг хураагуурын нийлүүлэлтийн сүлжээнд хяналтаа тогтоогоод байгаа юм.
БНХАУ автомашиныхаа экспортоор Японыг гүйцэж, 4.14 сая автомашин экспортолсны 1.55 сая нь цахилгаан хөдөлгүүртэй автомашин байжээ. Харин 2014 онд цахилгаан болон хосолмол хөдөлгүүртэй 75 мянга орчим автомашин нийлүүлж, 533 мянган автомашин экспортолж байсан аж. Тухайн үед тус улсын дотоодын зах зээлд “Volkswagen”, “General Motors” зэрэг олон улсын автомашин үйлдвэрлэгчид давамгайлж байсан юм. Эдгээр компанийг 1980-1990 онд дотоодынхоо компаниудтай хамтарсан үйлдвэрлэл эрхлэх замаар зах зээлд нэвтрэхийг зөвшөөрч байсан байна. Ингэснээр тул улс дугуй хэрэглээнээс автомашинд шилжилт хийхэд түлхэц болж байв.
БНХАУ хүрээлэн буй орчны сорилтуудыг шийдвэрлэхэд тэргүүлэхийн тулд түлшинд хэмнэлттэй автомашин үйлдвэрлэхэд төвлөрч эхэлсэн байна. 2012 онд борлуулалтын зорилгоо тогтоох, татаас олгох, цэнэг хураагуурт зориулсан дэд бүтцийг хөгжүүлэх зэрэг цахилгаан автомашины салбарын хөгжлийг дэмжсэн бодлогын баримт бичиг гаргаж эхэлжээ. Эдгээр нь тус улсыг автомашин үйлдвэрлэлийн чиглэлд тэргүүлэхэд гол суурь алхмууд болсон байна.
2010 оны эхээр БНХАУ цахилгаан автомашин хэрэглэгчдийн эрэлтийг татахад гол анхаарсан зүйл нь хямд үнийг санал байв. Автомашины цэнэг хураагуур буюу туулах хугацаанд хязгаар тавьж өгснөөр хямд үнээр борлуулах боломжтой болжээ. Үүний дараа дотоодын компаниудынхаа өрсөлдөх чадварыг нэмэгдүүлэхийн тулд “Tesla” компанид БНХАУ-д 100 хувь үйл ажиллагаа эрхлэх тусгай зөвшөөрөл олгосон байна. 2019 онд “Tesla” Шанхай дахь үйлдвэрээ барьж БНХАУ-ын зах зээлд нэвтэрсний дараа дотоодын үйлдвэрлэгчид нь илүү холын зайн чанартай автомашинууд үйлдвэрлэж эхэлжээ.
Сэтгүүлч Д.Отгонсүрэн
